唱：尺板的笃琴弦起，今朝偶唱段娘家戏呀，
　　一段娘家戏，出在何方地，出在伢，绍兴平水斗丘喂咯里。
　　斗丘有位翠姐姐，娘家平水是樟园喂咯里。
　　只因为，平水旧时有规矩，新媳妇，要三年以后好句起。
　　一条规矩磨盘重，着么难啊难……难煞伢个翠姐姐，难煞伢个翠姐呀姐。
　　从此是，日等太阳快落西，夜盼雄鸡咯咯喂咯啼，
　　春去秋来换节气，三年媳妇，三年媳妇是勿容易。
表：宝林哥，建新弟，着伢老婆实足四年勿回娘家哉哦，今朝是头一沓，奈帮偶送送句起，着当奈大拧客看哉咯，要被奈嘴无吃达油罗罗咯句来。
唱：翠姐姐坐进眠轿里，从平水斗丘一直要抬回樟啊园呀里。哎~~~~~哦~~~~~~
　　耶妹妹，四喜外甥抱手里，耶爹爹，开出后门割菜起，
　　耶弟弟，夹网一背扣螃蚍，耶哥哥，薄刀一拿要杀鸡。
　　翠姐姐，勿见娘亲来看伊，一寻寻到房间啊里，
　　姆妈困在眠床里，见阿囡，又落眼泪又欢喂咯喜，
　　喜的是，亲生阿囡回屋里，偶悲的是，有了媳妇常淘气。
　　暂勿唱，娘囡相会在房里，要唱耶嫂嫂有介私喂咯利，
　　防得姑娘偷东西，甏头甏脑盖盖齐，
　　铜轴藏进汤锅里，火钳塞进灰仓里，
　　三脚两步上楼梯，箱子大柜锁勿及，
　　耳听楼下要杀鸡，关进房门落楼起。
　　伢拧家屋里穷到嗒嗒啦咯滴，勿拨侬杀鸡摆阔气，
　　随手夺牢只老母鸡，侬夺来，偶夺起，毛毛夺赖稀稀，
抬轿两个堂兄喂咯弟啊，旁边看得呆酥起。
表：闹，宝林哥，伢斗丘里咯鸡讲杀得吃咯，奈咯耶讲扯死吃咯啊？着侬年纪小岁把，到底随勿晓得哉拉，偶么听老年拧话过哉，话扯煞鸡咯味道是奈咯鲜来佬。
唱：灶头嫂嫂在夺鸡，房里惊动翠姐呀姐。
　　走出房门看仔喂咯细，两筐热泪咽呀肚底。
　　姆妈呀，嫂嫂对偶有介私利，偶猜得出，她平日如何对待啊你。
　　姆妈呀，你尝尽了婆媳勿和咯苦滋味，因此你，叫偶孝顺公婆敬夫喂咯婿。
　　姆妈呀，偶自从嫁到斗丘里，伢娘囡相会在梦里，
　　偶是茶不思，饭无味，偶想回娘家……偶想回娘家，是勿容喂咯易。
　　想不到啊，今朝回到娘家地，偶反为侬娘亲来添是喂咯非。
　　阿囡呀，偶看侬，还是原轿来得原轿去，过几天，偶达斗丘来看望你。
　　姆妈呀，见面又与娘分离呀，女儿是懂得娘心意。
　　哥哥呀，侬勿要为偶再杀鸡，杀鸡是一定要淘啊气。
　　嫂嫂呀，嫂嫂呀，百样事情偶能依，临别有话来恳求喂咯你。
　　只因为，偶哥哥忠厚，偶哥哥忠厚太像爹，弟妹幼小还勿懂理，
　　母亲若有亏待你呀，总要侬嫂嫂原谅伊。
表：姆妈，偶……偶起哉哦！阿囡！阿囡，娘咯些肉喂……可怜肉啊肉啊……
唱：翠姐姐原轿回到斗丘里，进房独自流眼泪。
表：抬轿两个堂兄弟，来到耶阿婆面前，
把翠姐姐回娘家所看到咯一切都同耶阿婆讲了一遍，
闹，
特别是耶嫂嫂如何对耶阿婆咯情况也讲了一遍，
称赞翠姐姐是个好媳妇，好快，侬起劝劝伊，侬起劝劝伊。
唱：阿婆她耐心耐向安慰翠姐呀姐，翠姐姐从此更加孝敬伊。
　　转眼间三十年，哎三十年，媳妇当了婆么翠姐姐，两房媳妇都讨齐，
　　银行里么，存进六千人民币，有四只肉猪关栏里。
　　养了十只老鸭廿只鸡，私有地，种上蔬菜加菩荠，
去年新屋已造起么今年买进电视机，太婆已有九十几，合家和睦拧心齐。
　　同志们若有机会到伢绍兴起，偶陪奈到斗丘起望望伊。