绍兴莲花落《女儿红》

越地莲花 · 发表于 2011-2-1 17:21

写黄色的吧,创新

顽石 · 发表于 2011-1-27 13:35

这是根据王云根老师建议，修改后的第一稿

唱：绍兴自古有名声，

　　稽山鉴水好风景。

　　得天独厚咯好地名，

　　怎会缺少好产品。

表：伢绍兴，地方勿大，名气勿小。一直来是中外闻名的水乡、桥乡、书乡、酒乡、戏乡、兰乡、名士之乡。不过，照我话来，介许多咯“乡”当中，还应该再加上一条“吃乡”！为啥呢？相信台下底咯朋友们都晓得。伢绍兴不少有名咯特产，都和吃有关联。像绍兴香糕、龙须糖、老台门汤包、咸亨茴香豆、臭豆腐、安昌扯白糖、香肠、柯桥豆腐干、干菜毗猪肉、嵊州香榧、新昌小京生等等，都是名扬四海哉咯。则要话顶有名么，总还要算伢绍兴老酒。

唱：自古老酒出绍兴，

　　绍兴老酒有名声。

　　老酒为啥介有名，

　　其中原因需讲清。

　　一靠那，绍兴百姓多聪明，

　　勤劳朴实有才能。

　　二靠那，鉴湖水，光光清，

　　矿物丰富最要紧。

　　聪明百姓加好风景，

　　酿出咯老酒甜津津。

表：绍兴老酒用咯是嫡嫡清咯鉴湖水，矿物丰富营养多少咯好来。伢如果给所有酒来排排队，绍兴老酒可算得上是头名状元。如果在伢绍兴老酒格块牌子下面，再来把各式各样咯老酒品种排排队么，排来排去就得算伢“女儿红”哉咯。

唱：绍兴老酒女儿红，

　　香气扑鼻味道浓。

　　吃过咯人个个诵，

　　老酒当中邀头功。

表：格么为啥要叫伊女儿红呢？格里面有个小故事，则我啦是听伢外婆讲给我听咯，本来么是要保密咯，难么今朝日子机会难得，就讲给倷听听嗳哉……

唱：观众朋友勿可吵，

　　静静听我故事讲。

　　绍兴老酒女儿红，

　　伊咯名字有门堂。

表：故事大概发生在东晋封建王朝时代。

唱：绍兴古城鉴湖旁，

　　有个小村庄。

　　村里头，有户人家本姓王，

　　户主名叫王水堂。

　　王水堂啊王水堂，

　　鉴湖旁边开酒坊。

　　伊做酒本事算头挑，

　　大家尊称伊王酒郎。

　　酒郎咯老婆叫李月芳，

　　大家闺绣有名望。

　　倻爹娘爱伊像珍宝，

　　时刻不让她离身旁。

　　只因倻爹爹爱吃酒，

　　常去王水堂咯小酒坊。

　　水堂是，年纪轻卖相好，

　　月芳她，一见钟情王酒郎。

　　王酒郎和李月芳，

　　择定佳期喜成双。

　　从此后，水堂在家把酒做，

　　月芳卖酒在酒坊。

　　时光过去五月零，

　　月芳肚皮有反响。

表：啥咯反响啊？闹，结婚五个月，李月芳肚皮里有小拧哉。今朝日子夜头九点多些，王水堂从酒坊回来，走进房间，看见倻老婆眠床旁边还坐夯来，感觉有些奇怪。“娘子，佑奈咯嘎迟还勿困来，明朝老早要爬起咯呢？”“相公喂，我啦有桩事体要同侬讲讲哒来。”“啥咯事体嘎要紧？今朝迟哒哉，明朝日里也好话咯呢。”“相公喂，一定要今朝话咯啦，今朝勿话我要困勿熟咯啦！”“哦，实嘎咯啊，格偌话来，我听佬哒。”“闹……嗯……”要西哉，说了两个字么夺来话勿落起哉。“啥事体，偌话来好哉。”“嗯？……”“闹，偌话呀。”“闹……就是……嗯……”“就是啥西？”“就是……就是……”“就是啥西啊？嗬哟，偌话呀，我等得急煞哉啦。”李月芳倒底还年纪轻来，有些怕难为情，不过总归是大家闺绣，聪明到底聪明。嘴巴里话勿出口，伊倒来夯做动作哉。左手肚皮里摸摸，右手倻丈夫咯袖口扯扯，笑咪咪咯眼睛朝伊望望。王水堂看到丫老婆实嘎咯动作么，马上领悟到哉，“老婆，偌有哉啊？”李月芳轻轻咯点点头。水堂看到倻老婆点得点头么，伊激动煞哉。伊倒倻老婆肚皮高头耳朵贴哒牢，来哒作倻肉肉话“肉肉，肉肉，我咯心肝肉宝贝肉喂，我是倷爸爸，倷亲爱咯爸爸。来，先叫得我声嘎，叫呀，我外头听牢哒。”

唱：想想马上要当父亲，

　　王水堂么随高兴。

　　伊倒祖宗面前跪端正，

　　磕头跪拜多虔诚。

　　祖宗大人要显灵，

　　保佑伢娘子生小倌人。

　　拜得祖宗拜神灵，

　　烧香点烛勿耽停。

　　神灵啊，如果伢王家传后代根，

　　我蜡烛，一定点哒闹盈盈。

表：则么闹，王水堂连夜头做出决定，倻老婆从今朝日子开始，只要屋里头坐坐，生活勿用做，做酒卖酒、家务生活，全部由水堂一手握落。除此之外，伊要做几坛顶好顶好顶顶好咯老酒出来，来迎接倻宝贝伲子出生。一夜无话勿讲，第二日，水堂蒙早天亮爬起，就来到酒作坊里卖酒，等伊一有空落来，就回到后堂精心做酒。庆祝倻伲子降临咯酒从今早日子就开始准备起来哉。着伊也太咯性急哉，倻老婆刚刚就得有反应来，离生伲子咯日子还着实远来。不过听说要做爹啦的都是嘎咯，伊高兴得等勿牢哉了，顶好今朝日子作我话出来，明朝日子就有得生哉。则闹，水堂管自己来哒做酒，倻老婆屋里头坐坐，太阳曝曝，等小人出生。

唱：时光过去快得紧，

　　转眼又过六月零。

　　李月芳，肚皮痛哒紧层层，

　　今朝日子要临盆。

　　接生外婆老年人，

　　里里外外忙煞人。

　　水堂他，庆祝酒老早来做成，

　　立在门外急煞人。

　　娘子喊声一阵阵，

　　急煞我门外大男人。

　　日当中午已相近，

　　小人为何还勿出生。

　　恨只恨，时光过去木层层，

　　未见外婆报喜信，

　　苦只苦，我水堂是个男儿身，

　　不能进门看分明。

　　偌在外头愁煞人，

　　忽听里面有响声。

表：就在水堂立勿牢坐勿正咯辰光，忽听得房间里头一声啼哭，“哇……”王水堂连忙跳起来，“外婆生咚哉啊，外婆。”“偌咯杀头，外婆年纪嘎大哉，还会生啥西！闹，倷老婆生哒哉。”王水堂连忙走进房间，“外婆，生得个啥西啊？”接生外婆小人包扎好，“恭喜恭喜，添得咯千金。则倷真当是先开花后结果，恭喜倷哉。”一听话生得咯囡么，王水堂人都厥起。

唱：（绍剧）猛听得，娘子临盆生千金，

　　好似那，晴空霹雳雷轰顶。

　　我总道，祖宗保佑传后代根，

　　却不料，鹊巢竟被鸠来侵。

　　可笑我，三坛老酒成话柄，

　　天降麒麟成泡影。

表：王水堂一气之下，把专门为生伲子准备咯三坛老酒葬到了后院咯地下底。要晓得，老辈手里重男轻女咯思想木佬佬咯严重。个个人家都欢喜生伲子，覅生囡咯，伲子趣道要传宗接代咯呀。如果生个囡，要被别人家看勿起咯。则勿是伢噶卯，伢噶卯是到到处处都在提倡生囡生伲子一些样。有种人家还宁可欢喜生囡勿覅生伲子咯，倻话生囡负担轻，生伲子负担太咯重哉。趣道嘎辰光勿一样咯呀，男人一句话，女人呒得话。李月芳见丈夫实嘎副样式么，自知理亏，也呒有办法。不过，说话又话转来，勿管生囡生伲子，哪怕是生个十勿全，只要是自己生咯，爹娘大人都宝贝咯。来咚话呀，可怜天下父母心，宁可小人坏良心。王水堂是一时生气，一段时间以后气消哉么，也呒有事体哉，待个囡是作宝贝嘎咯啦。则闹，丫两老婆囡养养，老酒做做，酒坊开开，来哒度过光阴。

唱：时光流逝快如飞，

　　季节变更似流星。

　　眼睛一眨十八年，

　　十八年时间匆匆行。

表：今朝日子，水堂啦屋里较关闹热。为什么会有嘎闹热啊？原来，王水堂咯独养囡今朝日子要嫁人哉！哦，倷问我倻囡叫啥名字，相貌生得奈咯样式啊？闹……

唱：观众朋友勿可急，

　　听我慢慢诉真情。

　　伊三字名叫王玉英，

　　今年年纪十八春。

　　水乡姑娘多娴静，

　　浑身上下水灵灵，

　　但见她，青丝头发亮晶晶，

　　双凤眼睛水盈盈。

　　寸管鼻头笔笔挺，

　　樱桃小口红缨缨。

　　十指尖尖像嫩笋，

　　身材窈窕露聪颖。

　　哪里是平凡酒家女，

　　分明是人间活观音。

表：玉英姑娘从小生长在鉴湖旁边，吃咯是鉴湖里咯清水，看的是好山好风景，再加上伊爹娘大人本身咯品种好，尤其是吃咯老酒算头挑，相貌随好得覅好哉！台下底咯班大姑娘随话勿相信，倷叫绍兴老酒平常间头多吃吃，倷咯些相貌着实要好来闹。则勿是话倷现在相貌勿好，绍兴大姑娘咯相貌都作嫦娥娘娘下凡嘎好咯。我是话倷如果老酒多吃吃，相貌着实要好来。王水堂看到亻耶囡生得有嘎漂亮、嘎聪明么，心里多少咯高兴，再想想伊年纪也勿小哉，就把她许配给了自己最得意咯徒弟，今朝日子就是倻小两夫妻拜堂成亲咯日子。偌看……

唱：新郎新娘来成亲，

　　王水堂么随高兴。

　　亲朋叫来木层层，

　　酒水办哒闹盈盈。

　　伊老酒吃哒醉醺醺，

　　想起一桩大事情。

　　曾记得，当年娘子有身孕，

　　我烧香拜佛求神灵。

　　恳求神灵来保佑，

　　保佑王家传后代根。

　　若凡娘子生小倌人，

　　做坛老酒待客人。

　　娘子她，十月怀胎来临盆，

　　生下一个女千金。

　　我为得伊生囡勿生子，

　　三坛好酒葬端正。

　　多年来，我忙里忙外忙煞人，

　　未曾记得半毫分。

　　如今已过十八春，

　　不知老酒可变浑？

　　待我前去看分明，

　　看过灵清再决定。

表：对，勿管老酒好吃还是难吃，挖出来再话。王水堂想到格里，连忙叫上两三个帮手，把后院葬夯咯三坛老酒挖哒出来。勿晓得，等到酒坛盖打开么，一霎时香气扑鼻。王水堂是人呆住哉啦，要晓得伊做得一生一世咯老酒，从来也呒有闻到过嘎香咯香气，顿时精神一振。伊连忙用手指头蘸蘸尝了尝，只觉得神清气爽，浑身上下都感到从来也呒有过咯轻松，好像年轻得有咯十岁快。王水堂连忙吩咐手下人，把老酒搬出来给亲眷、朋友、邻舍、隔壁尝尝。大家尝得以后，是叫好声一片：“好酒，好酒。”“我吃得一辈子咯老酒，从来也呒有吃到过嘎好咯绍兴老酒过。”“多少咯糯哒牢，随赞！随赞！”“格种酒真当奥毛就得天高头有咚哉。”“天高头奈咯会有呢，天高头咯琼浆玉液么着实格咯老酒好吃呢。”要死哉，话哒来伊好像琼浆玉液吃过嘎话头呢。“酒郎，偌做酒咯本事真当越来越好哒哉。”“水堂兄喂，格酒味道嘎赞，叫啥咯名字啊？”王水堂无奈咯笑笑，伊把格酒咯来历，长短情况给大家讲得一遍。“当初咯辰光，我做好咯三坛酒也就得一般性咯。后来因为老婆生得个囡，我一赌气，才把伊葬夯后院咯地下底咯。今朝日子想起来罗起挖出来咯，所以，格酒叫啥咯名字我也勿晓得。”旁边头咯班人，听得水堂咯故事，都话嘎好咯老酒一定要有个名字才对咯。就在格些辰光，水堂咯女婿，也就是伊顶得意咯徒弟走出来来敬酒哉，听到老丈人实嘎一番话么，伊有主意哉。伊话：“爹爹喂，既然格咯老酒是偌当初咯辰光因为生得个囡罗葬夯咯，今朝日子，又是为倷囡办喜酒罗挖出来咯。依我看，就叫‘女儿红’好哉呢。”“格个名字好，既文雅又附合实情！”“水堂喂，偌个囡生得有嘎漂亮、嘎聪明，招得咯女婿也有嘎聪明，卖相有嘎灵，偌咯福气真当好咯呢。”“来，我看，伢大家为倻小两夫妻、为‘女儿红’、更为伢绍兴老酒又多得一个好品种，干上一杯。”“对，对，对，要干咯，要干咯。”“来，干杯！”“干！”哈哈哈哈……

唱：绍兴老酒女儿红，

　　黄酒家族添新宠。

　　个个捧起小酒盅，

　　大家干杯乐融融。

表：后来，自从王水堂发明得“女儿红”以后，聪明咯绍兴老百姓根据“女儿红”咯做法，把生伲子前葬夯咯老酒取名为“状元红”，又把酒装进雕出花纹咯酒坛里，取名为“花雕酒”。绍兴老酒因为有格三种新品种咯加盟，名气越来越大，一直走进人民大会堂，又走出国门，走向全世界！外地朋友要是到伢绍兴旅游，头一勿可忘记伢绍兴老酒。不过，要提醒倷一句，伢绍兴老酒营养虽好，但是因为伊外表温和，后劲十足，所以也勿可吃过头，吃过头也要伤身体咯。

唱：千载名传满浙东，
　　绍兴酒美论英雄。

　　至今盛宴如需醉，

　　加饭花雕女儿红。